التداول هو مبادلة شئ باخر ولو بسطنا الموضوع هنقول ان التداول في الاسواق المالية هو اي عملية بيع وشرا
وعملية البيع والشرا في الاسواق المالية بتم عن طريق 3 حاجات اول حاجة الادوات المالية تاني حاجة المتداول تالت حاجة السعر.
وخلينا نبدا بالادوات المالية في التداول في اربع ادوات وهي الاسهم والعملات والسلع واخيرا المشتقات او العقود الاجلة والاداة المالية اللي هي العملات بالتحديد فيها نوعين اول نوع هو تداول العملات الاجنبية او الفوركس ودا اللي هنتكلم عنه في الكورس وتاني نوع هو تداول العملات الرقمية ودا له كورس تاني شغالين عليه.
واللي لازم تعرفه هنا انك بتختار السوق المناسب ليك منهم وتشتغل فيه وبما انك في الكورس دا ف انت مهتم بالفوركس وعلشان متهوش مني في الاول كدا فنصيحتي ان افضل خيار لك هو الفوركس والعملات الرقمية والاسهم.
نيجي بقا لتانى حاجة وهي المتداول ودا بيكون بايع ومشتري واللي هو انت يعني والمتداول بردو كذا نوع في الداي تريدر ودا بيشتري ويبيع الحاجة في نفس اليوم وبيتداول علي حركة السعر اللي بتحصل خلال ثواني او دقايق او ساعات وفي السوينج تريدر ودا بيتداول علي حركة السعر اللي بتحصل خلال ايام او اسابيع او شهور واحيانا بتوصل لسنين قليله وفي بقا الانفيستور ودا المستثمر اللي بيشتري الحاجة ويسيبها سنين لحد ما تجيبله عائد كويس.
وطبعا انت اكيد دلوقتي بتسال انا هكون اي نوع من دول فاحنا بقا هنكون الداي تريدر واحيانا السوينج تريدر
واخر حاجة معانا بقا هي السعر والسعر في الاسواق المالية بيتغير كل ثانية ودا طبعا لان العرض والطلب بيتغير كل ثانية وخلينا نفهم في الاول نظرية العرض والطلب.
علي سبيل المثال اخوك الصغير في يوم طلب منك تجيبله لعبة ونزلت لاقيت اللعبة دي مفيش الا محل واحد بيبيعها بـ ١٠ دولار فجبتها لان طبعا مفيش غيره بيبيعها.
وتاني يوم نزلت علشان تجيب نفس اللعبة لاختك الصغيرة مثلا ولاقيت في محل تاني بقا بيبيعها بس بـ ٩ دولار ف انت جيبت منه طبعا لان سعره ارخص فاللي هتلاحظه هنا ان السعر نزل بس الطلب عليها متغيرش والطلب دا اللي هو انت لانك انت بس اللي بتشتري اللعبة دي ومفيش حد تاني بيطلبها فبالتالي العرض لما بيزيد هتلاقي ان السعر بيقل والعرض في المثال بتاعنا هو عدد المحلات اللي عارضه اللعبة للبيع.
المهم لحد بقا ما لاقيت في يوم وانت رايح تشتري اللعبة تاني ان في اكتر من محل عارضها بـ ٥ دولار بس فبالتالي هيبدأ الطلب يزيد عليها ومش انت بس اللي هتشتريها هتلاقي ناس كتير جدا جاية تشتري اللعبة دي لحد ما هتبدأ تخلص من السوق فبالتالي السعر هيبدأ يزيد وهيرجع تاني المحلات كلها تعرضها بـ ١٠ دولار ويمكن اكتر لان الطلب زاد عليها وبقا في غيرك ناس كتير عايزة تشتريها وهو دا معني العرض والطلب ببساطة.
https://youtu.be/BQk0nC91Kck
